ວັນທີ 7 ຕຸລາ

ຄິດວາງແຜນການໄປສູ່ເປົ້າໝາຍ

ທ່ານເຄີຍຖາມຕົວເອງຢູ່ບໍວ່າ ແທ້ຈິງແລ້ວທ່ານຕ້ອງການອັນໃດ  ທ່ານມີຊີວິດຢູ່ເພື່ອໃຜ ແລະ ເປົ້າໝາຍໃນຊີວິດຂອງທ່ານຄືຫຍັງ ?

      ເຊື່ອວ່າຄຳຖາມເຫຼົ່ານີ້ໃຜຫຼາຍຄົນລວມທັງທ່ານ ທ່ານຄົງເຄີຍຖາມຕົວເອງມາແລ້ວໃນຍາມທີ່ຕົວທ່ານຕົກຢູ່ໃນສະພາບທີ່ອ່ອນແອ ແລະຮູ້ສຶກທໍ້ແທ້ຄຳຖາມນີ້ຈະຜຸດຂຶ້ນມາໂດຍອັດຕະນຸມັດຈາກຈິດໃຕ້ສຳນຶກຂອງທ່ານ ເຊິິ່ງເປັນສິ່ງທີ່ບົງບອກວ່າຕອນນັ້ນທ່ານກຳລັງສັບສົນກັບຊີວິດຂອງທ່ານວ່າ ທ່ານຄວນຈະເຮັດແນວໃດກັບຊີວິດຂອງທ່່ານດີ.

      ການມີເປົ້າໝາຍໃນຊີວິດຄື ການທີ່ທ່ານມີພາບຂອງຄວາມສຳເລັດໄວ້ເບື້ຶອງໜ້າ ທ່ານຈະຮູ້ເຖິງທິດທາງທີ່ທ່ານຈະກ້າວໄປ ແຕ່ກ່ອນທີ່ທ່ານຈະໄປເຖິງພາບແຫ່ງຄວາມສຳເລັດທີ່ທ່ານຕັ້ງເປົ້າໝາຍໄວ້ເບື້ອງໜ້າ ທ່ານກໍຈະມີວິທີການຂອງຕົວທ່ານເອງທີ່ບໍ່ຄືໃຜໄປເຖິງເປົ້າໝາຍນັ້ນເຊັ່ນດຽວກັນກັບຄົນທົ່ວໄປເຊິ່ງມີເປົ້າໝາຍໃນຊີິວດຂອງຕົວເອງ ແລະເຂົາເຫຼົ່ານັ້ນກໍມີວິທີການທີ່ຈະໄປເຖິງເປົ້າໝາຍເບື້ອງໜ້າຂອງເຂົາດ້ວຍວິທີ່ທີ່ແຕກຕ່າງຈາກທ່ານເຊັ່ນກັນ ແຕ່ຖ້າທ່ານ ແລະໃຜອີກຫຼາຍຄົນບໍ່ມີພາບຫຼືເປົ້າໝາຍໃນຊີວິດ ທ່ານອາດຈະຕ້ອງຍ່າງວຽນໄປວຽນມາ ແລະມີຄວາມຮູ້ສຶກວ່າ ຕອນນີ້ທ່ານກຳລັງຫຼົງທາງ ແລະກຳລັງເດີນທາງຢ່າງບໍ່ມີຈຸດໝາຍປາຍທາງ ທ່ານຄົງບໍ່ຢາກເປັນແບບນັ້ນດອກ.

ຖ້າເປັນແບບນັ້ນທ່ານຄວນຈະເຮັດແບບໃດ ?

ການມີເປົ້າໝາຍໃນຊີວິດ ຄືຄຳຕອບວ່າ ເຮົາມີຊີວິດຢູ່ເພື່ອອັນໃດ ເພື່ອໃຜ ແລະຢູ່ແບບໃດ ຊີວິດປຽບເໝືອນການເດີນທາງ ແລະນັກເດີນທາງທີ່ສະຫຼາດຍ່ອມມີເປົ້າໝາຍໃນການເດີນທາງສະເໝີ ເຂົາຈະບໍ່ຍອມສູນເສຍເວລາງທາງໜ້າ ເພາະຈະເຮັດໃຫ້ເຂົາໄປເຖິງຈຸດມຸ່ງໝາຍໄດ້ຊ້າລົງ ການເດີນທາງຂອງຊິວີິດບໍ່ໄດ້ລາບລື່ນ ແລະ ສວຍງາມຄືໂຮຍດ້ວຍກີບກຸຫຼາບສະເໝີໄປ ໃນລະຫວ່າງທາງນັ້ນສິ່ງທີ່ບໍ່ຄາດຄິດອາດເກີດຂຶ້ນໄດ້ສະເໝີ ປັນຫາ ແລະອຸປະສັກເປັນແຂກທີ່ບໍ່ໄດ້ຮັບເຊີນໃຫ້ມາຢ້ຽມຢາມເຮົາ ເພາະມັນມາເພື່ອຈະທົດສອບເຮົາ ມາເຮັດໃຫ້ເຮົາເມື່ອຍລົງ ທໍ້ແທ້ ໝົດຫວັງ ໝົດແຮງ ໝົດກຳລັງໃຈທີຈະເດີນໄປ ແລະເຮັດໃຫ້ຈຸດໝາຍປາຍທາງນັ້ນຍາວໄກອອກໄປ.

ອັນໃດຄືສິ່ງຈຳເປັນສຳຫຼັບນັກເດີນທາງທີ່ຈະເອົາຊະນະແຂກທີ່ບໍ່ໄດ້ຮັບເຊີນເຫຼົ່ານີ້ ຄຳຕອບຄື ຄວາມມຸ່ງໝັ້ນ ແລະຄວາມສະໝ່ຳສະເໝີ ເຖິງວ່າເຮົາຈະພົບກັບອຸປະສັກ ແລະ ປັນຫາຫຼາຍຢ່າງ ທີ່ເປັນມໍລະສຸມຂອງຊີວິດກໍວ່າໄດ້ ເຮົາກໍສາມາດທີ່ຈະໄປເຖິງເປົ້າໝາຍໄດ້ໃນທີ່ສຸດ ເຊິ່ງມັນອາດຈະຊ້າໄປແນ່ໜ່ອຍໜຶ່ງກໍບໍ່ແມ່ນສິ່ງສຳຄັນ ເພາະເຮົາເຮັດດີທີ່ສຸດແລ້ວ.